Caerdydd i groesawu Fforwm Cerddoriaeth Byd WOMEX yn 2013

Disgrifia UNESCO WOMEX fel 'y farchnad broffesiynol rhyngwladol bwysicaf ar gyfer cerddoriaeth byd o bob math'. Bydd y perfformiadau nos yng Nghanolfan Mileniwm Cymru gyda digwyddiadau’r dydd a’r ffair fasnach yn cael eu cynnal yn Arena Motorpoint Caerdydd.

Disgwylir i’r digwyddiad rhyngwladol hwn gynnwys oddeutu 60 cyngerdd gyda thros 300 o artistiaid, ffair fasnach gyda 650 o gwmnïau yn cynrychioli dros 90 o wledydd yn ogystal â 400 a mwy o newyddiadurwyr cenedlaethol a rhyngwladol; bydd hyn oll yn digwydd rhwng 23 a 27 Hydref, 2013.

Cynnig Caerdydd oedd y gorau gan guro cystadleuaeth ryngwladol lem oedd yn cynnwys Glasgow a Dulyn (oedd ar y rhestr fer).

Croesawyd y newyddion gan y Gwir Anrhydeddus Carwyn Jones AC, Prif Weinidog Cymru a ddywedodd:

"Mae WOMEX yn gyfle gwych i ddod â'r llwyfan cerddoriaeth byd pwysicaf i Gymru ac yn sgil hyn i ddatblygu'r sector yma mewn ffordd gynaliadwy. Bydd WOMEX 13 Caerdydd yn agor y drysau i farchnadoedd newydd ar gyfer cerddoriaeth o Gymru a sicrhau bod traddodiadau cerddorol Cymru yn dod yn fwy cyfarwydd i gynulleidfaoedd rhyngwladol ac yn eu gosod ochr yn ochr â cherddoriaeth ein cefndryd Celtaidd. Drwy groesawu WOMEX gallwn godi proffil ein cerddoriaeth draddodiadol yng Nghymru a thu hwnt."

Arweiniwyd y cais i gynnal WOMEX gan Cerdd Cymru : Music Wales, sy’n bartneriaeth newydd rhwng y Sefydliad Cerddoriaeth Gymreig, Celfyddydau Rhyngwladol Cymru a Chyngor Celfyddydau Cymru, gyda chefnogaeth British Council a Llywodraeth Cymru. Nod y bartneriaeth yw datblygu cerddoriaeth safonol Gymreig sy’n barod i’r farchnad ryngwladol, a denu llwyfannau rhyngwladol megis WOMEX i Gymru. Mae Canolfan Mileniwm Cymru, Arena Motorpoint Caerdydd, Cyngor Caerdydd a Cardiff & Co i gyd yn bartneriaid ffurfiol WOMEX 13 Caerdydd.

Meddai Dai Smith, Cadeirydd, Cyngor Celfyddydau Cymru:

"Mae hwn yn lwyddiant ysgubol i Gymru. Mae wedi bod yn uchelgais hir dymor i Gyngor Celfyddydau Cymru a’n partneriaid i ddenu WOMEX i Gymru. Mae'r digwyddiad o bwys byd-eang hwn yn rhan bwysig o'n cynlluniau i ddatblygu diwydiant cerddoriaeth fywiog a ffyniannus yma."

Meddai Daniela Teuber, Cyfarwyddwr Cynhyrchu WOMEX:

"Rydym wrth ein boddau mai Caerdydd fydd yn cyflwyno WOMEX yn 2013. Mae'r ddinas yn lleoliad gwych i'n digwyddiad cymhleth a'r 2500 o fynychwyr ac artistiaid o bedwar ban byd. Mae’r partneriaid cynhyrchu yng Nghymru yn broffesiynol tu hwnt ac yn llawn egni. Mae’r adeiladau gwych o fewn tafliad carreg i’w gilydd ac yn diwallu'n hanghenion i'r dim. Mae gan Gymru gyfoeth diwylliannol arbennig, ynghyd â lletygarwch a phrydferthwch naturiol."

Wyneb ymgyrch Caerdydd 2013 yw "Brenhines y Delyn" a llysgennad Cerddoriaeth Cymru, Catrin Finch. Bu’n cyflwyno amrywiaeth o gerddoriaeth Gymreig i gynulleidfa dan ei sang o bobl proffesiynol y diwydiant cerddoriaeth byd yn WOMEX 10 Copenhagen. Croesawodd y newydd:

"Mae'n wych fod WOMEX yn dod i Gaerdydd. Mae'n ddigwyddiad cyffrous i gerddorion a cherddgarwyr. Dyma gyfle i ni glywed y gorau o gerddoriaeth byd ar ein stepen drws a sicrhau bod cerddoriaeth Cymru i'w glywed drwy'r byd."

Cefnogir yr uchelgais i gynnal WOMEX gan Strategaeth newydd Prif Ddigwyddiadau Llywodraeth Cymru sydd â’r nod o ddatblygu digwyddiadau'r byd yng Nghymru.

Diwedd

Am ragor o wybodaeth, cysylltwch â Siân James, Swyddog y Wasg a'r Cyfryngau, Cyngor Celfyddydau Cymru ar 029 2044 1344 / 07812 801356 neu e-bostiwch sian.james@celfcymru.org.uk

Am ragor o wybodaeth ar Cerdd Cymru : Music Wales ewch i: www.cerddcymru.com

#womex13

Nodyn i'r golygydd:

Uchafbwyntiau'r cais – pam Caerdydd?

Cynnig Caerdydd oedd y gorau yn y gystadleuaeth.

Roedd ansawdd a maint Canolfan Mileniwm Cymru wedi gadael argraff ddofn ar y trefnwyr a ddaeth i ymweld yn gynt yn y flwyddyn. Gellir cynnal pob digwyddiad nos yno a Phlas Roald Dahl gerllaw sy'n hwyluso pethau i'r gynulleidfa.

Roedd mantais hefyd yn ffordd Cerdd Cymru : Music Wales o gael 'tîm Cymru' a ddangosai undod ledled y ddinas a llywodraeth leol a chenedlaethol.

Beth sydd ynddo i Gymru?

Daw WOMEX 13 Caerdydd â cherddoriaeth byd i'n dinas.

Dyma'r tro cyntaf i Gymru gael arddangosfa cerdd fasnachol fawr.

Yn ogystal ag elw economaidd o ran ymwelwyr i Gaerdydd, bydd cyfle i ddatblygu'r diwydiant cerddoriaeth yng Nghymru yn sgil WOMEX. Bydd hwn yn gatalydd i ddatblygu’r diwydiant cerddoriaeth yng Nghymru.

Mae gan Gymru dreftadaeth gerddorol sy'n werthfawr yn ddiwylliannol ac economaidd ond heb ei harddangos eto yn y farchnad hon.

Daw WOMEX 13 Caerdydd â chyfle i'n cerddoriaeth draddodiadol gael llwyfan rhyngwladol a chysylltu’r sector yng Nghymru gyda Phrydain a’r byd.

Pwy sydd y tu ôl i'r cais? Beth yw Cerdd Cymru?

Arweiniwyd y cais gan Cerdd Cymru : Music Wales, partneriaeth rhwng Sefydliad Cerddoriaeth Gymreig a Chelfyddydau Rhyngwladol Cymru, adain ryngwladol Cyngor Celfyddydau Cymru.

Mae Cerdd Cymru : Music Wales yn uno cerddorion a'r diwydiant cerddoriaeth i ddatblygu cyfleoedd rhyngwladol sydd o fudd i Gymru yn economaidd ac yn ddiwylliannol.

Cyngor Caerdydd, Cardiff and Co, Arena Motorpoint Caerdydd a Chanolfan Mileniwm Cymru yw Cyfarwyddwyr Cerdd Cymru : Music Wales a chefnogir y bartneriaeth gan Lywodraeth Cymru a'r British Council.

Am ragor o wybodaeth am WOMEX, ewch i: www.womex.com